رحیم یار خان میں اے پی آر این ایس اجلاس، الیکشن تاریخ اور ممبر سازی مہم پر اہم فیصلے

رحیم یار خان میں اے پی آر این ایس ضلعی کابینہ کا اہم اجلاس، الیکشن شیڈول اور تنظیمی امور پر مشاورت

یکم مئی سے 7 مئی کے درمیان الیکشن تاریخ دینے کا اعلان، ممبر سازی مہم جاری رکھنے کا فیصلہ

رحیم یار خان ( نیشن آف پاکستان نیوز آن لائن) رحیم یار خان میں اے پی آر این ایس کی ضلعی کابینہ کا ایک اہم اجلاس منعقد ہوا، جس میں تنظیمی امور، آئندہ انتخابات کی تاریخ، ممبر سازی مہم اور مستقبل کے لائحہ عمل پر تفصیلی غور کیا گیا۔ اجلاس میں ضلعی عہدیداران اور ممبران نے بھرپور شرکت کی اور تنظیم کو مزید فعال بنانے کے عزم کا اظہار کیا۔

اجلاس میں ضلعی صدر عتیق خان، سینئر نائب صدر رانا حنیف، نائب صدر سردار جام ربنواز، جنرل سیکرٹری دلگیر خان نیازی، ڈپٹی جنرل سیکرٹری شمائلہ، سیکرٹری نشر و اشاعت ڈاکٹر جہانگیر، فنانس سیکرٹری یوسف چوہان، جوائنٹ سیکرٹری رانا طفیل، ڈپٹی جوائنٹ سیکرٹری ملک جاوید درگھ، انفارمیشن سیکرٹری محمد خرم خان لغاری اور چیئرمین مجلس عاملہ رانا زاہد محمود اقبال شریک ہوئے۔

ابتدائی کابینہ چھ ماہ کیلئے قائم

اجلاس میں بتایا گیا کہ ضلعی باڈی کا قیام ابتدائی طور پر چھ ماہ کے لیے کیا گیا ہے۔ اس مدت کے دوران تمام عہدیداران کی کارکردگی کا جائزہ لیا جائے گا، جبکہ بہتر کارکردگی دکھانے والوں کو آئندہ بھی آگے بڑھنے کا موقع فراہم کیا جائے گا۔

الیکشن تاریخ جلد جاری ہوگی

جنرل سیکرٹری دلگیر خان نیازی نے اجلاس سے خطاب کرتے ہوئے کہا کہ یکم مئی سے 7 مئی کے درمیان ضلعی انتخابات کی تاریخ کا اعلان کیا جائے گا۔ تاریخ سامنے آنے کے بعد ایک اور اہم اجلاس طلب کیا جائے گا جس میں انتخابی شیڈول اور دیگر معاملات طے کیے جائیں گے۔

ممبر سازی مہم جاری رکھنے کا فیصلہ

سینئر نائب صدر رانا حنیف نے کہا کہ انتخابات مکمل ہونے کے بعد بھی ممبر سازی کا عمل مسلسل جاری رکھا جائے گا تاکہ زیادہ سے زیادہ ورکنگ صحافیوں کو تنظیم کا حصہ بنایا جا سکے۔

کمزور صحافیوں کو حقوق دلانے کا عزم

جی ایم جٹ کا خصوصی پیغام بھی اجلاس میں سنایا گیا، جس میں انہوں نے کہا کہ کمزور اور نظر انداز کیے گئے صحافیوں کو سپورٹ کیا جائے گا اور انہیں وہ تمام حقوق دلائے جائیں گے جن سے وہ محروم رہے ہیں۔

انہوں نے کہا کہ تنظیمی نظم و ضبط برقرار رکھنے کے لیے ہر رکن کو عہدے کے مطابق ادب و احترام کا خیال رکھنا ہوگا، چاہے ذاتی تعلقات کتنے ہی مضبوط کیوں نہ ہوں۔

ورکنگ صحافیوں کے حقوق کی جدوجہد جاری

جنرل سیکرٹری دلگیر خان نیازی نے کہا کہ بعض ادارے صرف مخصوص افراد کو صحافتی اسناد جاری کرتے ہیں جبکہ دیگر ورکنگ صحافیوں کو نظر انداز کیا جاتا ہے۔ انہوں نے کہا کہ جی ایم جٹ اسی ناانصافی کے خلاف جدوجہد کر رہے ہیں تاکہ اصل صحافیوں کو ان کا حق اور شناخت مل سکے۔

تنظیمی منشور پر بھی گفتگو

سیکرٹری نشر و اشاعت ڈاکٹر جہانگیر نے تنظیمی منشور مرتب کرنے کی تجویز دی، جس پر انہیں بتایا گیا کہ اے پی آر این ایس کا مرکزی منشور پہلے سے موجود ہے اور ضلعی کابینہ اسی منشور کے تحت اپنی سرگرمیاں جاری رکھے گی۔

یہ بھی پڑھیں: رحیم یار خان کے قبرستانوں میں اضافی فیس کا انکشاف | لواحقین کا احتجاج